¸¸.»شهيتني صوتك آ«.¸¸

[خليك بعيد]

مستوحش من غيبتك قدلي(اسبوع)
.............يا حيف تنساني وانا ما اقدر انساك
وكل القضيه صوت دافي ومسموع
.............من عبر جوالك وانا اسمع حكاك
كني مابين اضلاعي العوج ملسوع
.............كل ما آتذكر يا المقفي سواياك
الهجر في سلم الاجاويد ممنوع
.............لكن صغير وعاذرك .. ويش دراك !!
قلبي لا كنه يا اريش العين ممزوع
.............مزعة قدم حافي وعاثر بالاشواك
من يوم ما قفيت والدمع ينبوع
.............كنه يتدفق من عيوني ويرجاك
لكن مشيت وصار لشداد مرفوع
.............ولا عاد بك حيله وقفت مطاياك
واصبحت كني خالي العقل مصروع
.............وجف الحكي من قبل لا انطق ولا جاك
شهيتني صوتك .. وجوعتني جوع
.............ويا حالة محبك .. ويا شين فرقاك
تحدني لقصاي واجي لك بطوع
.............وانا ما آحب اني احدك على اقصاك
وش ذنب من حبك يلاقيك دلوع
.............تخطي عليه وكل ما اخطيت مشاك
ما للخطايا منك ناتج ومجموع
.............سوى العذاب بخافق اللي تمناك
لكن على الله والامل غير مقطوع
.............في شوفت عيونك وفي لمس يمناك
من يوم غبت وكل ليله لي شموع
.............تذوب لين الفجر حتى تحراك
ابكي بدمع اللي لقى آخيه مصروع
.............ويصيح كنه يوم اناديك ناداك
فيني لحبك ارض واشجار وفروع
.............تشبها بالطيش وآنا اتدفاك
باتقول لي وشفيك باقول موجوع
.............باتسبني من خاطرك باتفداك
الله خلقني انسان لكن لي طبوع
.............بس الوكاد انه عطاني ولا اعطاك
اني احس بغيبتك طول ( الاسبوع )
.............وانك على بالي ولا اقدر انساك !!